Помощь небесных покровителей. Полный сборник молитв на каждый день года (осень) Олейникова Таисия

Молитва первая,

чтомая в Леснинском монастыре Холмской епархии

О предивный страстотерпче и изрядный угодниче Христов, отче наш Афанасие!

Со умилением ныне преклоняем колена сердца нашего и взываем ти: принеси молитву нашу к Милостивому и Всесильному Богу и испроси нам у благости Его вся яже на пользу душам и телесем нашим: веру праву, надежду несумненну, любовь нелицемерну, во искушениих мужество, в злостраданиих терпение, в благочестии преспеяние, да не во зло обратим дары Всеблагаго Бога, но во славу имене Его святаго и в прославление твоего о нас ходатайства.

Церковь же святую от расколов и ересей сохрани, верныя укрепи, заблуждшия на путь правыя веры обрати: отечество твое сохрани от враг ненаветно и споборай оружию крестоноснаго воинства.

Испроси, угодниче Христов, у Царя царствующих и Господа господствующих благодать и силу и благословение небесное правителем государства нашего и подаждь государству нашему тишину и благоустроение.

Не забудь, чудотворче святый, и святую обитель сию: сохрани и соблюди ю молитвами твоими от всякаго зла. Ей, святче Божий, помяни и всех притекающих ко священней раце твоей, и сподоби их кончину благую улучити и Царствие Небесное унаследити, да прославим дивнаго во святых Своих Бога, покланяемаго в Триех Ипостасех, Емуже подобает всякая слава, честь и держава во веки веков. Аминь.

Молитва вторая

из службы

О великий угодниче Христов, святый преподобномучениче Афанасие! К тебе мы, грешнии и смиреннии, яко к теплому нашему заступнику и скорому помощнику, молитвенно прибегаем и из глубины сердца взываем: призри на ны скоро и умоли Человеколюбца Бога, да не осудит нас, грешных, по беззакониям нашим, но да сотворит с нами по великой Своей милости. Охрани нас своим заступлением от облежащаго ны суемудрия и неправоверия и яко пастырь добрый упаси заблуждшия овцы стада Христова и во дворы Господни сия всели. Огради нас от соблазнов, ересей и расколов и настави твердо в вере Православней подвизатися. Потщися, скорый о нас предстателю, благоприятным твоим ходатайством умоли Господа, да низпослет нам тихое и богоугодное житие, уврачует Своею благодатию наша болезни, душевныя и телесныя, согреет наша сердца любовию друг ко другу и сотворит ны братолюбны и единомысленны. Испроси такожде у Господа и всего потребнаго для жития нашего телеснаго: земли плодородие, благорастворение воздухов и мирное устроение. Страну нашу, веси и грады охрани молитвами твоими от огня, потопа, труса, вражескаго нашествия и внутренних нестроений. Утверди в нас память смертную, да и мы, в истиннем покаянии и чистем сведении совести нашея представше ко Господу, сподобимся деснаго стояния и со всеми святыми воспоем славу Отцу и Сыну и Святому Духу во веки веков. Аминь.

Молитва первая

из акафиста

Возвеличим чудотворцы и мученики, звезды незаходимыя, сыны великаго князя Владимира, блаженнии Романе и Давиде, иже на земли ангелы и на небеси человеки Божии, кровию бо вашею всю землю Российскую освятисте. О, двоице священная, братия прекрасная, доблии страстотерпцы Борисе и Глебе, от юности Христу верою, чистотою и любовию послужившии, и кровьми своими, яко багряницею, украсившиися, и ныне со Христом царствующии! Не забудите и нас, сущих на земли, но, яко теплии заступницы, вашим сильным ходатайством пред Христом Богом сохраните юных во святей вере и чистоте неврежденными от всякаго прилога неверия и нечистоты, оградите всех нас от всякия скорби, озлоблений и напрасныя смерти, укротите всякую вражду и злобу, действом диавола воздвигаемую от ближних и чуждих. Молим вас, христолюбивии страстотерпцы, испросите у Великодаровитаго Владыки всем нам оставление прегрешений наших, единомыслие и здравие, избавление от нашествия иноплеменных, междоусобныя брани, язвы и глада. Снабдевайте своим заступлением страну нашу и всех, чтущих святую память вашу, во веки веков. Аминь.

Молитва вторая

из службы благоверным князьям

О двоице священная, братие прекрасная, доблии страстотерпцы Борисе и Глебе, от юности Христу верою, чистотою и любовию послужившии, и кровьми своими, яко багряницею, украсившиися, и ныне со Христом царствующии! Не забудите и нас, сущих на земли, но, яко теплии заступницы, вашим сильным ходатайством пред Христом Богом сохраните юных убо во святей вере и чистоте неврежденых от всякаго прилога неверия и нечистоты, оградите всех нас от всякия скорби, озлоблений и напрасныя смерти, укротите же всякую вражду и злобу, действом диавола воздвизаемую от ближних и чуждих. Молим вас, христолюбивии страстотерпцы, испросите у Великодаровитаго Владыки всем нам оставление прегрешений наших, единомыслие и здравие, избавление от нашествия иноплеменных, междоусобныя брани, язвы и глада. Снабдевайте заступлением страну нашу и всех, чтущих святую память вашу, во веки веков. Аминь.

Молитва третья

Нет умения и сил прославить вас, святые братья! Вы небесные люди и земные ангелы, столпы и утверждение земли нашей. Помогите своему отечеству, вознесите молитву о всей земле русской, о блаженное вместилище, приявшее ваши телеса честныя, как многоценное сокровище, блаженная церковь, в которой стоят ваши святые раки! И не только нашему племени дано было Богом спасение, но и всей земле. От всех стран туда приходят и безмездно получают исцеление. О, блаженные страстотерпцы Христовы, не забывайте отечества, где пожили вы телесно, не оставляйте его посещением, и в молитвах всегда молитесь о нас, чтобы не постигло нас зло и чтобы не коснулась болезнь телес ваших рабов. Ибо вам дана благодать молиться за нас. К вам прибегаем, умоляем вас, припадая к вам со слезами. Но надеясь на вашу молитву, возопим ко Спасу: Господи, поступи с нами милосердно, помилуй нас, ущедри, заступи молитвами пречистых Твоих страстотерпцев, не предай нас в поношение, но излей милость Твою на овец пажити Твоей, ибо Ты – Бог наш, Тебе славу возсылаем, Отцу и Сыну и Святому Духу. Аминь.

Молитва четвертая

из акафиста

Святии страстотерпцы, боголюбивая двоице, благовернии князи Борисе и Глебе, измлада всею душею Христа возлюбившии, целомудрие, кротость, смирение и прочия добродетели стяжали есте и, яко агнцы незлобивии, от брата своего неправедное убиение претерпели есте, чистыя своя души в благоприятную жертву Богу принесосте и от Него венцы нетленныя приясте, припадающе к честному образу вашему, молим вас в Дусе сокрушенне и смиренне: вознесите своя усердныя молитвы ко Всемилостивому Спасу нашему, да подаст нам, чтущим святую память вашу, великия Своя и богатыя милости. Церковь Свою Святую да соблюдет от ересей и расколов, в чадех ея да оживет дух правыя веры и любве, дух ведения и благочестия, да дарует всем нам вся, яже к жизни временней и вечней потребная. Ей, святии страстотерпцы, ускорите на помощь к нам, якоже сроднику вашему благоверному князю Александру Невскому и избавите страну нашу от враг видимых и невидимых, от глада, огня, смертоносныя язвы, от всяких бед и напастей; разгоните облежащий ны мрак неверия и развращения, да мирно и благочестно поживем в веце сем и сподобимся христанския кончины и добраго ответа на Страшнем Суде Христа Бога, Емуже подобает честь и поклонение со Безначальным Его Отцем и Пресвятым Животворящим Его Духом, ныне и присно и во веки веков. Аминь.

Молитва первая

из службы с акафистом

Святый и великий архангеле Божий Михаиле, неисповедимыя и пресущественныя Троицы первый во ангелех предстоятелю, рода же человеческаго приставниче и хранителю, сокрушивый с воинствы своими главу прегордаго денницы на небеси и посрамляяй выну злобу и коварства его на земли! К тебе прибегаем с верою и тебе молимся с любовию, буди щит несокрушим и забрало твердо святей Церкви и православному отечествию нашему, ограждая их молниеносным мечом твоим от всех враг видимых и невидимых. Буди ангел-хранитель, премудр советодатель и споспешник всем православным Христианом, износя им от престола Царя царствующих просвещение и силу, радость, мир и утешение. Буди вождь и соратай непобедим христолюбивому воинству нашему, венчая его славою и победами над супостаты, да познают вси противляющиися нам, яко с нами Бог и святии ангели Его. Не остави же, о архангеле Божий, помощию и заступлением твоим и нас, прославляющих днесь святое имя твое: се бо аще и многогрешни есмы, обаче не хощем в беззакониих наших погибнути, но еже обратитися ко Господу и оживленным быти от Него на дела благая. Озари ум наш светом Божиим, иже выну сияет на молниевидном челе твоем, да возможем разумети, что есть воля Божия о нас благая и совершенная, и ведети вся, яже подобает нам творити и яже презирати и оставляти. Укрепи благодатию Господнею слабую волю и немощное произволение наше, да, утвердившеся в законе Господнем, престанем прочее влаятися земными помыслы и похотеньми плоти, увлекающеся, по подобию несмысленных детей, скорогибнущими красотами мира сего, яко ради тленнаго и земнаго безумне забывати вечная и небесная. Над всеми же сими испроси нам свыше дух истиннаго покаяния, нелицемерную печаль по Бозе и сокрушение о гресех наших, да остающее нам число дней временнаго живота нашего иждивем не во угождении чувств и работе страстем нашим, но во изглаждении зол, содеянных нами, слезами веры и сокрушения сердечнаго, подвигами чистоты и святыми делами милосердия. Егда же приблизится час скончания нашего и свобождения от уз бреннаго сего телесе, не остави нас, архангеле Божий, беззащитных противу духов злобы поднебесных, обыкших преграждати души человечестей восход в горняя, да, охраняеми тобою, безпреткновенно достигнем оных преславных селений райских, идеже несть печаль, ни воздыхание, но жизнь безконечная, и сподобльшеся узрети пресветлое лице Всеблагаго Господа и Владыки нашего, падше со слезами у ногу Его, в радости и умилении воскликнем: слава Тебе, дражайший Искупителю наш, Иже за премногую любовь Твою к нам недостойным благоволил еси послати ангелы Твоя в служение спасению нашему. Аминь.

Молитва вторая

из службы

О святый Михаиле Архангеле, светлообразный и грозный Небеснаго Царя воеводо! Прежде Страшнаго Суда ослаби ми покаятися от грехов моих, от сети ловящих избави душу мою и приведи ю к сотворшему ю Богу, седящему на херувимех, и молися о ней прилежно, да твоим ходатайством послет ю в место покойное. О грозный воеводо Небесных Сил, предстателю всех у Престола Владыки Христа, хранителю твердый всем человеком и мудрый оружниче, крепкий воеводо Небеснаго Царя! Помилуй мя, грешнаго, требующаго твоего заступления, сохрани мя от всех видимых и невидимых враг, паче же подкрепи от ужаса смертнаго и от смущения диавольскаго и сподоби мя непостыдно предстати Создателю нашему в час страшнаго и праведнаго Суда Его. О всесвятый великий Михаиле Архистратиже! Не презри мене, грешнаго, молящагося тебе о помощи и заступлении твоем, в веце сем и в будущем, но сподоби мя тамо купно с тобою славити Отца и Сына и Святаго Духа во веки веков. Аминь.

Молитва третья

Молитва сия древняя, написана на паперти Чудова монастыря в Кремле – в церкви Михаила

Господи Боже Великий Царю, Безначальный!

Посли, Господи, Архангела Твоего Михаила на помощь рабу Твоему (имя) изяти мя от враг моих видимых и невидимых.

О Господень Михаиле Архангеле! Демонов сокрушителю: запрети всем врагам, борющимся со мною, сотвори их, яко овцы и сокруши их, яко прах пред лицем ветра.

О Господень Великий Архангеле Михаиле! Шестокрылатый первый княже, воеводо небесных сил Херувим и Серафим.

О угодный Михаиле Архангеле, буди ми помощник во всех обидах, в скорбях, печалях; в пустынях, на распутиях, на реках и на морях – тихое пристанище. Избави мя, Великий Михаиле Архангеле, от всяких прелестей диавольских, егда услыша мя грешнаго раба своего (имя), молящагося тебе и призывающаго тебя и призывающаго имя твое святое: ускори на помощь мне и услыши молитву мою.

О великий Архангеле Михаиле! Победи вся противящееся мне силою Честнаго и Животворящаго Небеснаго Креста Господня, молитвами Пресвятыя Богородицы и святых апостолов, святаго пророка Божия Илии, святителя Николая Чудотворца, святаго Андреа юродиваго, святых великомучеников Никиты и Евстафия, преподобных отец и святых святителей, мучеников и всех святых Небесных Сил. Аминь.

Молитва четвертая

из службы

Святый и великий Архистратиже Божий Михаиле, ниспровергий с небесе диавола и воинство его! К тебе с верою прибегаем и тебе с любовию молимся, буди щит несокрушим и забрало твердо Святей Церкви и православному Отечеству нашему, ограждая их молниеносным мечем твоим от всех враг видимых и невидимых. Буди ангел хранитель, наставник премудр и споспешник предводителем нашим. Буди вождь и соратай непобедим христолюбивому воинству нашему, венчая его славою и победами над супостаты, да познают вси противляющиися нам, яко с нами Бог и святии ангелы Его. Аминь.

Молитва пятая

О святый Михаиле Архангеле, помилуй нас, грешных, требующих твоего заступления, сохрани нас, раб Божиих (имена), от всех видимых и невидимых враг, паче же подкрепи от ужаса смертнаго и от смущения диавольскаго, и сподоби нас непостыдно предстати Создателю нашему в час Страшнаго и праведнаго Суда Его. О всесвятый великий Михаиле архистратиже! Не презри нас, грешных, молящихся тебе о помощи и заступлении твоем в веце сем и в будущем, но сподоби нас тамо купно с тобою славити Отца и Сына и Святаго Духа во веки веков. Аминь.

Молитва первая

из книги молебных пений

О святый и всехвальный, многострадальный и преблаженный, преподобне и богоносне отче Макарие, светильниче всесветлый, Духа Святаго сиянием горяй и светяй, и вся со усердием к тебе притекающия просвещаяй, веры святыя некрадомое сокровище, надежды несумненное богатство, любве неисчерпаемая пучино, чистоты непорочное зерцало, постников труждающихся крепосте, твердых подвигопоклонников украшение, любомудрия сладкопесненный проповедниче, смиренномудрия премудрый учителю, иноков честное наставление, всем правоверным преизящное удобрение, призывающим же тя в бедах и скорбех скорый помощниче и теплый сущим в нуждах предстателю! Услыши мя тебе днесь молящагося и с верою и любовию к многоцелебным и многочудесным мощем твоим припадающаго. Яви на мне окаяннем неизреченное твое милосердие: даждь славу имени Божию и не остави мя грешнаго уповающаго на тя; вем бо, вем, человече Божий, яко много может молитва праведнаго поспешествуема во благое, и кая словесная и разумная тварь не исповесть тя, благолепно, свято и непорочно и праведно посреде рода человеча на земли пожившаго и на небеси прославляемаго. Ты бо, еще во плоти сый, не дал еси сна очима твоима, ни веждома твоима дремания, дондеже немерцающий свет Присносущныя и Неразделимыя Троицы узрел еси. Темже колена твоя изнемогоста от поста, и плоть твоя изменися елеа ради, яко да благоугодная и благоприятная жертва Господеви явишися. О неизглаголанная доброто, бодрости светлый изяснителю, Макарие святе! Возведи ныне очи твои к могущему спасти нас Всесильному Богу, и умоли Его, да отвратит праведный Свой гнев, движимый на ны за беззакония наша, и избавит храм сей, и всякий храм и град, веси и всякия страны, и люди Своя, от глада, губительства, труса, потопа, огня, меча, нашествия иноплеменников и междоусобныя брани, паче же да воздвигнет к деланию заповедей Своих, и да не предаст нас погибнути со беззаконии нашими. Ей, молимся тебе, богоносне отче Макарие, исцели немощи требующих твоея помощи, и буди нам в житии сем многомятежнем стена и забрало, крепость и утверждение, покров и заступление, и даждь нам во вся дни жизни нашея пожити в преподобии и правде и во всяком благочестии и чистоте. Даруй же нам святыми молитвами и яже ко спасению прошения, и исполни во благих желание наше: паче же в разлучении души от тленнаго и смертнаго телесе сего предстани нам в помощь скоро, умоляя за ны нелицеприятнаго, грознаго и страшнаго судию Христа Бога нашего, да избавит нас от воздушных мытарств и вечнаго томления, соединит же нас святому в вышних селению Своему, яко да тамо купно с тобою жительствующе, сподобимся единым сердцем славити и воспевати пречистое и великое имя Отца и Сына и Святаго Духа в безконечныя веки веков. Аминь.

Молитва вторая

из книги молебных пений

Боже, едине в милости богатый и щедрот неисчерпаемая пучино! Пред Твоим величеством согрешихом, беззаконновахом, нечествовахом, вослед мысли нашея лукавыя ходихом: о Твоих заповедех спасительных небрегше, возлюбленному Твоему поношение быхом: вси уклонихомся вкупе, и вси непотребни быхом. Темже затворихом щедроты Твоя и человеколюбие Твое и утробы милости Бога нашего злобы ради нашея, с неюже пожихом, и вемы, яко несмы достойни помилования. Но и еще, Господи, пощади нас, призри на немощь нашу, покрый бездну зол наших неизмеримою широтою милосердия Твоего: даждь нам, Владыко, да поне отселе к Тебе обратимся, настави нас на истину Твою, и исправи сердца наша к деланию заповедей Твоих, молитвами преподобномученика Макария, и молитв его ради сотвори ны наследники Царствия Твоего во веки веков. Аминь.

Молитва третья

из службы с акафистом

О всехвальный, преблаженный, многострадальный, преизящный, предивный чудотворче, преподобномучениче Макарие, скорый наш помощниче и теплый заступниче, духовнаго воинства Христова доблественный страдальче, вся враги душевредныя победивый! К тебе, яко истинному чудес источнику, мы грешнии припадающе, усердно молимся: помози, угодниче Божий, нам грешным и унылым в настоящем сем житии: умоли Господа Бога даровати нам оставление грехов наших, елико согрешихом от юности нашея во всем житии нашем, делом, словом, помышлением и всеми нашими чувствы: и во исходе душ наших помози нам окаянным, умоли Господа Бога, всея твари Содетеля, избавити нас от воздушных мытарств и вечнаго мучения, да всегда прославляем Отца и Сына и Святаго Духа, и твое милостивное предстательство, ныне и присно и во веки веков. Аминь.

Молитва четвертая

из службы

О преславный преподобномучениче Макарие, скорый помощниче и теплый заступниче всех, притекающих к тебе, предстательством своим пред Господом умоли Спаса нашего, да обратит души наша к покаянию и исправлению, да дарует мир отечеству нашему и всей земли и да поможет всем нам твердыми быти в вере Православней и делех благих, да отженет от нас дух злобы и лукавства и братолюбие вселит в нас, и да приносим во всем житии нашем плоды духовныя: любовь, благость, милосердие, веру нелицемерную, кротость и воздержание, и да, распявше на земли плоть нашу со страстьми и похотьми и духом живуще и ходяще, сподобимся жизни вечныя в веце грядущем, и, райския сладости присно наслаждающеся с тобою и со всеми святыми, прославим Отца, и Сына, и Святаго Духа, ныне, и присно, и во веки веков. Аминь.

Молитва первая

из акафиста

О Пресвятая Богородице! Призри с благосердием на моления нас, грешных и смиренных рабов Твоих, и умоли Бога Сына Твоего, да низпослет нам и всем, притекающим к Тебе, здравие душевное и телесное и вся, яже к вечней и временней жизни потребная, да простит нам всякое согрешение вольное и невольное; да избавит нас от всяких скорбей и болезней, и напастей и всякаго злаго обстояния. Ей, Царице наша Преблагая, Надеждо наша несокрушимая и Заступнице необоримая! Не отврати лица Твоего от нас, за множество прегрешений наших; но простри нам руце Матерняго милосердия Твоего, и сотвори с нами знамение во благо. Яви нам богатую помощь Твою и благопоспеши во всяком деле благом; от всякаго же начинания греховнаго и помышления лукаваго отврати нас, да выну славим Пречестное имя Твое и покланяемся честному образу Твоему; и величаем Бога Отца, и Единороднаго Сына Его, Господа нашего Иисуса Христа и Святаго Духа, со всеми святыми, во веки веков. Аминь.

Молитва вторая

из акафиста

Богорадованная Владычице, Препрославленная Мати щедрот и человеколюбия, Всемилостивая о всем мире Ходатаице, прилежно раби Твои, к Твоему Божественному предстательству прибегающе и пречудному образу Твоему со умилением припадающе молимся: молитву теплую Сыну Твоему и Богу нашему сотвори, о Всепетая Царице и Владычице, да всяких болезней и печалей нас, Тебе ради, избавит, и грехов всяких свободит, Царствия Своего Небеснаго наследники ны покажет, велие бо и неизреченное, яко Мати, имаши дерзновение к Нему и вся можеши, елико восхощеши, едина во веки Благая и Благословенная. Аминь.

Молитва третья

О Пресвятая и Богоизбранная Дево, Владычице наша Богородице, Небесе и земли Царице, на радость и утешение всему миру от безплодных и безчадных родителей Богом дарованная! Родившися Божиим промышлением, Ты разрешила еси неплодствие рождшия Тя, и ныне неплодное сердце мое плодоносно сотвори предстательством Твоим у престола Вседержителева, неплодствовати же соделай мя злыми делы, гнилыми словесы и нечистыми помышленьми. О Всеблаженная, да явлюся чадо Божие, добробетелей благоплодие присно приносящее. Ты утолила еси Пречистым Рождеством Твоим плач праматери нашея Евы, и праведныя родители Твоя избавила еси поношения безчадства, и ныне утоли плач и воздыхания многоболезненныя и любогреховныя души моея и избави всех нас поношения злосмрадных дел наших, страстей безчестия и от всякаго порабощения вражескаго. Наипаче же даруй нам, Пресвятая Богородице Дево, во всесветлый день Рождества Твоего чистым сердцем разумети и памятовати, с коликою радостию и благодарением неплодная утроба святыя праведныя Анны ношаше Тя, да и мы не точию словесы, но наипаче делы своими выну будем со умилением сердечнем прославляти Тя, вопиюще: Слава пришествию Твоему, Чистая. Слава Рождеству Твоему. Слава девству Твоему, Мати Безневестная. Купно же с Тобою сподоби нас непрестанно славити и величати Всесвятый Плод Твой, Слово воплощено, во чреве Твоем неопалимо носимо, Емуже слава подобает, честь и поклонение, со Безначальным Его Отцем, и с Пресвятым и Благим и Животворящим Его Духом ныне и присно и во веки веков. Аминь.

Молитва четвертая

из акафиста

Приими, Всеблагомощная Пречистая Госпоже Владычице Богородительнице, сия честныя дары, Тебе единей прикладныя, от нас, недостойных рабов Твоих, от всех родов избранная, всех тварей небесных и земных высшая явлынаяся, понеже бо Тебе ради бысть Господь сил с нами и Тобою Сына Божия познахом и сподобихомся святаго тела Его и пречистыя крове Его. Темже блаженна еси в родех родов, Богоблаженная, херувимов светлейши и серафимов честнейши сущая. И ныне, Всепетая Пресвятая Богородице, не престай молящися о нас, недостойных рабех Твоих, еже избавитися нам от всякаго совета лукаваго и от всякаго обстояния и сохранитися нам неврежденным от всякаго ядовитаго прилога диавольскаго, но даже до конца молитвами Твоими неосужденных нас соблюди, яко да, Твоим заступлением и помощию спасаеми, славу, хвалу, благодарение и поклонение за вся в Троице единому Богу и всех Создателю возсылаем ныне и присно и во веки веков. Аминь.

Молитва пятая

из акафиста

О Пречистая и Преблагословенная Дево Владычице Богородице, от неплодове по обетованию рождшаяся и чистоты ради души и тела Твоего сподобльшаяся быти Мати Сына Божия, Господа нашего Иисуса Христа, с Нимже ныне на небеси пребываеши и имаши велие дерзновение ко Пресвятей Троице, от Неяже, яко Царица, венцем вечнаго царствования увенчана еси. Темже смиренно к Тебе прибегаем и просим: исходатайствуй нам у Всемилостиваго Господа Бога прощения всех прегрешений наших, вольных и невольных; страждущему отечеству нашему спасение, мира, тишины и благочестия возстановление, времена мирна и безмятежна, крамол злых непричастна; ко изобилию же плодов земных, воздуха благорастворение, дожди мирны и благовременны, и вся яже к житию и спасению нашему потребна испроси нам у Сына Твоего, Христа Бога нашего. Наипаче же благопоспеши нам украситися благими нравы и добрыми делы, да, елико мощно, подражатели будем святому Твоему житию, имже от юности на земли украшалася еси, благоугождающи Господу, и сего ради явилася еси честнейшая херувим и славнейшая серафим. Ей, Госпоже Пресвятая, буди нам ко всем скорая помощница и премудрая ко спасению наставница, да Тебе последствующе и Тобою воспомощствуеми, сподобимся наследницы быти Небеснаго Царствия, страданьми Сына Твоего исходатайстваннаго, исполнителям же святых заповедей Его обещаннаго. Ты бо еси, Госпоже, едина наша по Бозе надежда и упование, и Тебе весь живот наш предаем, чающе Твоего ради ходатайства и заступления не посрамлени быти в час исхода нашего от жития сего и на страшнем суде Сына Твоего, Христа Бога нашего, деснаго Его стояния сподобитися и тамо вечно радоватися со всеми от века Ему благоугодившими и немолчно славити, хвалити, благодарити и благословляти Его со Отцем и Духом во веки веков. Аминь.

Молитва шестая

из акафиста

О Пресвятая Владычице, Христа Спасителя нашего Богоизбранная Мати, у Бога святыми молитвами испрошенная, Богу посвященная и Богом возлюбленная! Кто Тебе не ублажит или кто не воспоет Твоего преславного рождества. Рождество бо Твое бысть началом спасения человеков, и мы, седящии во тме согрешений, зрим Тя, Неприступнаго Света жилище. Сего ради витийствующий язык не может песнословити Тя по достоянию. Паче бо серафим возвысилась еси, Пречистая. Обаче приими от недостойных раб Твоих нынешнее похваление и не отрини мольбы наша. Твое величие исповедуем, Тебе во умилении припадаем и скорую в заступлении чадолюбивую и благоусердную Матерь дерзновенно просим: умоли Сына Твоего и Бога нашего даровати нам, много согрешающим, искреннее покаяние и благочестное житие, да возможет творити вся Богу угодная и душам нашим полезная. Возненавидим вся злая, укрепляемии Божественною благодатию во благом произволении нашем. Ты, непостыдная Надеждо наша, в час смерти, даруй нам христианскую кончину, безбедное шествие на страшных мытарствах воздушных и наследие вечных и неизреченных благ Царствия Небеснаго, да со всеми святыми немолчно исповедуем Твое о нас заступление и да славим единаго Истиннаго Бога, во Святей Троице покланяемаго, Отца и Сына и Святаго Духа. Аминь.