Помощь небесных покровителей. Полный сборник молитв на каждый день года (весна) Олейникова Таисия

Молитва первая,

из книги «Акафисты и каноны»

Господи Иисусе Христе, Сыне Бога Живаго, Творче неба и земли, Спасителю мира! Се аз недостойный и паче всех грешнейший, смиренно колена сердца моего пред славою величества Твоего преклоняя, воспеваю и величаю безмерное страдание Твое, и благодарение Тебе Царю всех и Богу приношу, яко благоизволил еси снити с Небеснаго престола Твоего и воплотитися от Пречистыя Девы Марии, ради спасения человеческаго; бесплотен сый, плотское естество Божеству совокупил еси; богат сый, волею обнищал еси, да человека во Царствии Твоем обогатиши; труды и всякия человеческия беды, яко человек, на Себе понесл еси, да всем во всяких печалех и нуждах пособствуеши; четыредесять дней постивыйся, всем к воздержанию путь показал еси; множицею от лукавых искушен был еси, всех от искушений всяких избавляя. Вем, Всесильный Владыко, яко вся сия Тебе непотребна быша, но человеческаго ради спасения вся претерпел еси; предан был еси за тридесять сребреник, да человека искупиши от лютыя работы вражия; от немилостивых иудей, яко незлобивый агнец, похищен был еси, род человеческий от поглошения волка мысленнаго исторгая; на судилищи пред Анною и Каиафою предстал еси, всех осуждения огня вечнаго отводя; связан, поруган, оплеван, от ложных свидетелей оклеветан и на поносительную смерть осужден был еси, человека от всякия напасти, мучения и от вечныя смерти свобождая; Пилату, никоего зла содеявый, предан был еси, и ко Ироду послан, и паки поруган, человека от злаго обстояния и от поруганий вражиих избавляя. Что убо воздам Тебе, Владыко Человеколюбче, о всех, яже претерпел еси меня ради грешнаго? Не вем: душа бо и тело и вся благая от Тебе суть, и вся моя Твоя суть, и аз Твой есмь; точию на безчисленное Твое милосердие, Благосердне Господи, надеяся, пою Твое неизреченное долготерпение, величаю неисповедимое смотрение Твое, славлю Твою безмерную милость, имиже преклонился еси мене ради осужденнаго, да аз оправдан буду. К столпу, Спасе, привязан и без милости биен, милостив сый, разреши мя, молюся, от грехов моих; тернием венчан, души моея греховное терние искорени; тростию биен по главе, сокруши главу змия уязвляющаго мя жалом греха; в багряну ризу оболчен и мучителем предан, просвети ми, Царю Пресвятый, одеяние душевное, да вниду в чертог Твой всекрасный; с разбойники вменен и крест на раму Твоею понесый, разбойника врага, ищущаго душу мою убити, Твоим крестом прожени. Вем Тя, Иисусе Долготерпеливе, люте уязвлена; от верху главы Твоея святыя, даже до стопы ножныя, не бе в Тебе места цела. Что же возглаголю о неизреченнем человеколюбии Твоем, Христе Спасителю? Точию в сокрушении сердца моего, покланяяся Твоим пречистым страстем и вселюбезно тыя лобызая, вопию: помилуй мя грешнаго. На кресте пригвоздитися изоливый, пригвозди заповедем Твоим сердце мое; воздвижен со крестом на горе Голгофе, воздвигни мысли моя к небеси, да всегда горняя мудрствую; желчию со оцтом напоен, огорченное грехом сердце мое услади любовию Твоею, и жаждуща напой потоком сладости Твоея; руце Твои пречестнеи распрострый на приятие всех, приими мя грешнаго; нозе пригвождены имевый, хотя всегда со грешники быти, буди со мою грешным, возбраняя ногам моим от всякаго пути лукаваго; сердце отверсто имевый, яви мне благодать Твою грешному; главу Твою пресвятую на кресте преклонивый, услыши недостойныя молитвы моя. О пречудная и неизмеримая глубинно милосердия, Христе Боже! За враги распинатели Твоя Богу Отцу моливыйся, даждь и мне грешному сию благодать, любити враги моя и молитися за них; разбойнику кающемуся рай отверзый, воззри, Свете мой, на мя грешнаго, подаждь покаяние, и отверзи ми двери милости Твоея, и помяни мя недостойнаго во Царствии Твоем. Наконец, Дух Твой Пресвятый предавый в руце Богу Отцу, приими, Создателю, дух мой во время кончины моея; со креста снят и во гробе яко мертв положен, Спасе, живый во свете неприступнем, возьми от мене тяжкое бремя греховное, и не возгнушайся, Человеколюбче, вселитися во гроб серца моего недостойнаго, на умервщление моего плотскаго мудрования; яко да не ктому Себе бренное создание Твое, но Тебе Господеви и Богу моему живый, Твоим, о Всемилостиве, благосердием, сподоблюся видети Тебе Создателя и Спасителя моего, за приятие смерти крестныя, славою и честию венчанаго, во свете неприкосновенныя Твоея славы; идеже со Безначальным Твоим Отцем, и со Пресвятым и Благим и Животворящим и Единосущным Твоим Духом, царствуеши прежде век, ныне и присно и во веки веков. Аминь.

Молитва вторая

из акафиста

О Всечестный и Животворящий кресте Господень, кровию Христа Бога нашего освященный! Ты еси знамение победы на враги наша видимыя и невидимыя; ты имаши явитися в час страшнаго суда Христова. Тебе смиренно покланяюся, честно прикасаюся и любезно тя лобызаю, нынешнее моление ко Распятому на тебе принося, да исцелит мя силою в тебе Своею от всех недугов душевных и телесных, и сохранит от враг видимых и невидимых, и неосужденна на суде Своем одесную поставит. Ей, Животворящий Кресте святый! На тебе Спас умирая за умершия грехми человеки, Дух Свой яко человек испусти, кровь же и воду источи, и сими треми едино, еже паче всех есть на потребу, спасение нам содела, во славу источника вод живых Бога Отца, Себе же от кровей девических воплощена Бога Сына, и Бога Духа Святаго, оживляющаго дух человечь; ихже триех во едином Божестве славити и мне пособи от воды крещения восприятою верою непорочною, во причастии же плоти и крове Господних надеждою несумненною, и в покаянии духом сокрушенным, и любовию нелицемерною, да тако не токмо в жизни сей плачевней, яко вода мимо текущей, но и в будущем блаженнем животе прославлю Господа, пособием силы твоея, кресте треблаженне, и поклонюся Ему самым лица зрением верованному, одержанием же чаянному и наслаждением любимому, Единому в Троице славимому в бесконечному веки веков. Аминь.

Молитва третья

из акафиста Животворящему Кресту Господню

О Пречестный и Животворящий Кресте Господень! Древле убо был еси казни позорныя орудие, ныне же знамение спасения нашего присно почитаемое и прославляемое! Како достойне возмогу аз недостойный воспети Тя и како дерзну преклонити колена сердца моего пред Искупителем моим, исповедая грехи свои? Но милосердие и неизреченное человеколюбие Распеншагося на тебе смиренное дерзновение подает ми, да отверзу уста моя во еже славити тя; сего ради вопию ти: радуйся, Кресте, церкве Христовы красота и основание, всея вселенныя – утверждение, христиан всех – упование, царей – держава, верных – прибежище, ангелов – слава и воспевание, демонов – страх, губительство и отгнание, нечестивых и неверных – посрамление, праведных – услаждение, обремененных – ослаба, обуреваемых – пристанище, заблуждших – наставниче, одержимых страстьми – раскаяние, нищих – обогащение, плавающих – кормчий, слабых – сила, во бранех – победа и одоление, сирых – верное покровение, вдов – заступниче, дев – целомудрия охранение, ненадеянных – надежда, недужных – врач и мертвых – воскресение! Ты прообразованный чудотворящим жезлом Моисея – животворный источник, напаяющий жаждущия духовныя жизни и услаждающий наши скорби, ты – одр, на нем же царственно почил тридневно Воскресший Победитель ада. Сего ради и утро и в вечер и полудне прославляю тя, треблаженное Древо, и молю волею Распеншагося на тебе, да просветит Он и укрепит тобою ум мой, да открыет в сердце моем источник любве совершенней и вся деяния моя и путие мои тобою осенит, да выну величаю Пригвожденнаго на тебе, грех моих ради, Господа Спасителя моего. Аминь.

Молитва четвертая

из акафиста Божественным страстям Христовым

Господе Иисусе Христе, Сыне Бога Живаго, Творче неба и земли, Спасителю мира! Се аз недостойный и паче всех грешнейший, смиренно колена сердца моего пред славою величества Твоего преклонив, воспеваю крест и страдания Твоя, и благодарение Тебе Царю всех и Богу приношу, яко благоизволил еси вся труды и всякия беды, напасти и мучения яко человек понести, да всем нам во всяких печалех, нуждах и озлоблениих состраждущий Помощник и Спаситель будеши. Вем, Всесильне Владыко, яко вся сие Тебе убо не быша потребна, но человечскаго ради спасения, да всех нас искупиши от лютыя работы вражия, крест и страдания претерпел еси. Что убо воздам Тебе, Человеколюбче, о всех, яже пострадал еси мене ради грешнаго; не вем: душа бо и тело и вся благая от Тебе суть, и вся моя Твоя суть, и аз Твой есмь. Точию на безчисленное Твое, Благосерде Господи, милосердие надеяся, пою Твое неизреченное долготерпение, величаю неисповедимое истощание, славлю Твою безмерную милость, покланяюся пречистым страстем Твоим, и вселюбезно лобызая язвы Твоя, вопию: помилуй мя грешнаго, и сотвори, да не безплоден будет во мне крест Твой святый, но да с верою страданием Твоим зде причащаяся, сподоблюся видети и славу Царствия Твоего на небеси. Аминь.

Молитва пятая,

чтомая в Крестном монастыре Архангелогородской епархии

Благодарю Тя, Господи Царю всех, царствующаго небом и землею и преисподнею; благодарю Тя, Безначальне, Всесильне Царю Вседежителю; благодарю Тя, Преблагий, Всемилостивый, Наставниче заблуждшим, на землю с небес сошедый и воплотивыйся от Девы Марии, нашего ради спасения, и бывый Един Бог и человек подобен мне, кроме страстей и всякаго греха, не привидением же, но истиною безстрастный неправедно от беззаконник пострадавый, да безстрастие мне осужденному за множество грехов моих подаси. Пою Твое неизреченное долготерпение, Господи; величаю неисповедимое смотрение Твое, славлю Твою безмерную милость, имиже преклонься, мене осужденнаго оправдал еси. Покланяюся страстем Твоим, имиже аз безчестнейших пременихся страстей; лобызаю Твой крест, имже мой грех осудил еси и от смертнаго осуждения мя свободил еси; лобызаю гвозди оныя, имиже клятвы потребил еси запрещение; целую язвы, имиже моего преслушания уврачевашася язвы. Целую трость, еюже подписал еси свобождение и еюже строптиваго змия уязвил еси главу; целую копие, мое рукописание растерзавшее и безсмертия источник отверзшее; целую губу, напоенную оцта и ко пречистым Твоим принесенную устом, еюже преслушания моего горькое во сладкое претворися. О неизмеримая глубино милосердия Твоего, Христе Спасителю наш! Темже смиренно со благодарением Ти припадаем, и Животворящему Твоему Кресту, имже нас спасл еси от работы врагу, любезно кланяемся. Исповедуем, яко Ты еси Един свят, Един крепкий и Един Жизнодавец, и на всех имаши волю прикладну. Тобою, Господи, дается на диавола и на его воинство крепость, и Тебе славу возсылаем, со Безначальным Твоим Отцем, и с Пресвятым и Благим и Животворящим Твоим Духом, ныне и присно и во веки веков. Аминь.

Молитва шестая

из молитвослова

Покланяемся Ти, Честное Древо, отгоняющее от нас всякое демонское стреляние и освобождающее нас от всех бед, скорбей и напастей. Ты бо еси Древо Жизни, Ты еси очищение воздуха, освящение Святаго Храма, ограждение нашего жилища, охранение одра моего, просвещение ума моего, сердца и всех моих чувств. Твое Святое Знамение ограждает мя со дня моего рождения, просвещает со дня моего Крещения; Оно со мною и на мне во вся дни живота моего: и на суше, и на водах. Оно же сопровождать мя будет до могилы, осенит и прах мой.

Оно бо, Святое Знамение чудодейственнаго Креста Господня, возвестит всей вселенней о часе всеобщаго Воскресения мертвых и последняго Страшнаго и Праведнаго Суда Божия.

О Кресте Всечестный, осенением Твоим вразуми, научи и благослови мя, недостойнаго, всегда несомненно верующаго в непобедимую силу Твою, огради мя от всякаго супостата, и исцели вся недуги моя душевныя и телесныя.

Господи Иисусе Христе, Сыне Божий, силою Честнаго и Животворящаго Креста Твоего помилуй и спаси мя, грешнаго, отныне и во веки веков. Аминь.

Молитва седьмая

из акафиста страстям Христовым

На Кресте пригвожденный за ны, Иисусе Христе, Единородный Бога Отца Сыне, милости, любве и щедрот неисчерпаемая бездно! Вем, яко грехов ради моих, от неизреченнаго человеколюбия, Кровь Твою пролияти на Кресте изволил еси, юже аз, недостойный и неблагодарный, доселе скверными моими делы попирах и нивочтоже вменях. Тем убо из глубины беззакония и нечистоты моея умныма очима на распятаго Тя на Кресге Искупителя моего воззрев, со смирением и верою во глубину язв, Твоего милосердия исполненных, себе повергаю, грехов прощения и сквернаго жития моего исправления прося. Милостив буди мне, Владыко и Судие мой, не отрини мя от лица Твоего, но всесильною Твоею рукою Сам мя к Тебе обрати и на путь истиннаго покаяния настави, да отныне положу спасения моего начало. Божественными страданьми Твоими укроти моя плотския страсти; излиянною Твоею Кровию очисти моя душевныя скверны; распятием Твоим распни мя миру с соблазны его и похотьми; Крестом Твоим огради мя от невидимых враг, ловящих душу мою. Прободенныма рукама Твоима руце мои от всякаго неугоднаго Тебе дела воздержи. Пригвожденный плотию, пригвозди страху Твоему плоть мою, да, уклонився от зла, творю благо пред Тобою. Преклонивый главу Твою на Кресте, к земли смирения приклони вознесенную мою гордыню; венцем Твоим терновым огради моя ушеса, во еже не слышати не полезнаго; желчь устами вкусивый, положи хранение нечистым устом моим; отверстое копием имеяй сердце, сердце чисто во мне созижди; всеми Твоими язвами всего мя сладце в любовь Твою уязви, да Тебе, Господа моего, возлюблю всею душею, всем сердцем, всею крепостию и всем помышлением. Даждь ми Себе странна и не имуща, где главы подклонити; даждь ми Себе Всеблагаго, избавляющаго душу мою от смерти; даждь мне Себе Всесладкаго, услаждающаго мя в скорбех и напастех Своею любовию, да Егоже первее ненавидех, прогневлях, от себе изгонях яко Кресту пригвождах, Сего ныне возлюблю, радуяся прииму и сладце Крест Его до конца жизни моея понесу. Не даждь отселе, о Всеблагий Искупителю мой, ни единой моей воле совершатися, понеже зла есть и непотребна, да не паки впаду в тяжкую работу царствовавшаго во мне греха; но Твоя воля благая, спасти мя хотящая, да совершается во мне всегда, ейже себя вручая, Тебе, распятаго Господа моего, умным очесем моего сердца представляю и молю из глубины души, да и в разлучении моем от бреннаго моего тела, Тебе единаго на Кресте Твоем узрю, в руце мя защищения Своего приемлюща, и от воздушных духов злобы храняща, вселяюща же со грешники, покаянием Тебе благоугодившими. Аминь.

Молитва восьмая

из акафиста Животворящему Кресту Господню

Кресте Честный, хранитель души и телу буди ми: образом своим бесы низлагая, враги отгоняя, страсти упраздняя и благоговение даруя ми, и жизнь, и силу, содействием Святаго Духа и честными Пречистыя Богородицы мольбами. Аминь.

Молитва первая,

чтомая в Кирилло-Мефодиевской церкви града Ченстохова

О Всемилостивая Госпоже, Царице Богородице, от всех родов избранная и всеми роды небесными и земными ублажаемая! Воззри милостивно на предстоящия пред святою иконою Твоею люди сия, усердно молящияся Тебе, и сотвори предстательством Твоим и заступлением у Сына Твоего и Бога нашего, да никтоже изыдет отсюду тощь упования своего и посрамлен в надежде своей, но да приимет кийждо от Тебе вся по благому изволению сердца своего и по нужде и потребе своей, во спасение души и во здравие телу. Моли, Милосердая Владычице, Пренебеснаго Бога, да присно соблюдет Церковь Свою святую во Православии и твердей вере до конца веков. Призирай благосердием, Всепетая, и призрением милостиваго Твоего заступления на все царство Всероссийское, царствующия грады наша и град сей и святый храм сей, и на сия богатыя Твоя милости неоскудно изливай, Ты бо еси всесильная Помощница и Заступница всех нас. Приклонися к молитвам раб Твоих и прошением их, услыши воздыхания и молитвы, имиже раби Твои молятся на святем месте сем. Аще и иноверный или иноплеменный, зде проходя, помолится, услыши и милостивно соделай, яже к помощи ему и ко спасению. О Всепетая Мати, Надеждо наша Преблагая! Собери разсеянныя, неверныя же и иноверныя во странах наших на путь истинный настави, отпадшия от благочестивыя веры паки возврати и Святей Православней Кафоличестей Церкви их сопричти: в домех наших мир утверди, старость поддержи, юныя настави, младенцы воспитай, сирыя и вдовицы заступи, плененныя свободи, болящия уврачуй, на суде и в заключениих и в заточениих и в горьких работах сущия помяни, ограждающи ны присно от всякаго зла благочестию Твоею, и утеши милостивным Твоим посещением и вся благодеющия нам. Даруй же, Благая, земли плодоносие, воздуху благорастворение и вся, яже на пользу нашу, дары благовременныя и благопотребныя молитвами избранных угодников святых Кирилла и Мефодиа, в ихже храме и предстоим вси. Прежде отшедшия отцы и матери, братию и сестры наша упокой в селениих святых, на месте злачне, на месте покойне, идеже несть печаль и воздыхание. Егда же приспеет и наше от жития сего отшествие и к вечней жизни преселение, предстани нам, Преблагословенная Дево, и даруй христианскую кончину жития нашего безболезненну, непостыдну и святых Таин причастну, да и в будущем веце сподобимся вси, купно со всеми святыми, безконечныя блаженныя жизни во Царствии возлюбленнаго Сына Твоего, Господа и Спаса нашего Иисуса Христа, Емуже подобает всякая слава, честь и поклонение, со Безначальным Отцем и Святым Духом, во веки веков. Аминь.

Молитва вторая,

чтомая в церкви села Забелина Владимирской епархии

О Пресвятая Владычице наша Богородице, Небесная Царице, наша Преблагая Надеждо, преизящная Отроковице, ненадеющимся надеяние, грешным спасение, сирым прибежище, странным предстательнице, нагим одеяние, скорбящим утешение и радосте, обидимым покровительнице и всем сущим в бедах и напастех вспоможение и заступление! О Всемилостивая Госпоже Дево Богородице! Зриши наша беды, скорби и напасти, помози нам немощным, печальным и унылым, скорбным же и отчаянным, и всяку печаль отими от нас. Обиду нашу Ты веси, разреши ту, Всенепорочная, якоже волиши и можеши, не даждь нам во отчаяние впасти. Не имамы бо иныя помощи, разве Сына Твоего, Христа Бога нашего, и Тебе, о Мати Божия, о Владычице наша! Темже на Твой пречестный образ со воздыханием и сокрушением сердца взираем, и колена до земли преклоняем, взывающе: призри благосердым оком, Всепетая Богородице, и услыши нас, Преблагая, не отрини, но благоволи помиловати, не омерзи нашего воздыхания. Никтоже бо притекаяй к Тебе посрамлен от Тебе исходит, но просит благодати и приемлет дар на пользу прошения во веки веков. Аминь.